ADİR Û AWE, TÊMÎYAN DE NÊBENÊ

No, ‘guna’ nîyo. Qanunê tabîyetî, îlim û zaneye, zaf çîyan zelal kerdê. Waxto ke raya verêne  aşme girotîye, yêno mi vîr re, ez dewe de bîya. Hewa bî tarî, roj bî tarî. Ma, qic, pîl, cênî, camêrdî, pêro tersa yîme. Se ‘metersime’? Roje bîye tarî. Ma ra vatêne, ‘cin û pêrîyî roştîye girotê’. Seba ke ‘cin û pêrîyî roştîye ravirdê’, ma duwayî kerdêne. Ma gereke înan bitersnime. Seba naye, ma defan, tenekan, asinan, kemeren kuyêne, qîrêne, kerdêne ‘haybiro-axirser ke’, ê b,tersê, roştîe ra durî bibê.

Ma bi saetan qîrayîme. 

Ma yê feqîran o waxt çi zanitê ke no ‘qanunê tabîyetî yo ? Asme û tîje, ge-ge yênê girotene. No, qanunê tabîyetî yo, naye ra mordem nêşikîno îtîraz bikero. No, seba her kesî yo. Hama çîya ke ez wazena vajî, no wo;

ÎNKARÊ TİRKAN, QANUNÊ TABÎYETÎ NÎYO. Na xirabîye, ne hard, ne asmên, ne tabîyet, ne însanetîye qebul nêkeno. Naye, ne Quran de, ne Zenda Aveste de, ne Tebrat de, ne Alewîtîye de, ne încil de şima nêvênenê. Naye hem Tayîb Erdogan, hem Atatirk, hem AKP, CHP, MHP, her kes zaneno. Xo ra ecêbîye zî ‘nê zaneyîye der a’! Ti hem na xirabîye bizane, hem zî bike! Şima zanenê qey na xirabîya zelale kenê, qey zura zelale kenê, qey bi zaneye benê zureker? Seba pereyî! Heya, tenya seba pereyî! Sistemo ke maaş dano nînan, serê na xirabîye de, serê înkarê ma de pêyda bîyo, aye ra. Sîstem ke rêyê serê zurekerîye û xirabîye ra peyda bîbo, endî sîstemkarî, ê yê ke nê sîstemî seba risqê xo şeveknenê, mecburê ke zureker bibê. Risqê înan serê înkarê ma de vecîno. Tayîb Erdogan, Dînayet-mînayet rind zanenê ke, Homa naye qebul nêkeno. Ê rind zanenê ke, waxto ke merdî, seba nê înkarî û seba na kerdena qafçile, homa înan nêruşneno ‘cennet’ !

Ê Homayo ke qaşo ci ra bawer kenê, xapnenê. La ê, seba maaşî tenya xo xapnenê. Mordem qey hondayê beno zureker û qefçil ? Aqil qey nîya xo ra tecavuz keno’ ?  Aqil qey nîya beno dişmenê aqilî ?

Pere bira, pere !

Maaşê înan, no sîstemo aqil ra qefçil de vecîno. Maaş û risqê  ‘inan ke bibirîyo,  kes ‘nê…. no’ nê sîstemê înkarî. Eke risqê înan bibirîyo, kam xo xapneno her serre şono ‘Anitqabîr?’. Kam zurî keno vano ‚ ‘Ne mutlî’, efendimê xo ra vaji ‘Tirkim diyene’?

Şima ra ayb o, ayb!

‘Qorîcî’ seba pereyî ma kişenê, ‘jitem-mitem’ seba pereyî ma kişenê. Ma ‘Hîzbullah-mizbullah’ seba homayî ma kişenê? Yanê ê seba Homayî, no cano ke Homayî do ma, ma ra gênê, şonê ‘cennet’ ha?

Villay mi, rojê  se ke têlev’izyon de va ; ‘eke henî yo, cennet, nê qetilkaran ra pir o’.

Nê gonîwerî, Homayî zî seba risqê xo xapnenê. Nê adir ê. Adir û awe, pîya, têmîyan de nêbenê. Înkar û rastîye, pîya têmîyan de nêbenê. Na dewlete û ma, pîya têmîyan de nêbenîme, nêşikînîme pîya bicivîme. No, qanunê tabîyetî nîyo. No, qederê ma zî nîyo. Dewleta Tirkî, no înkar û na zurekerîye ra, qetilkerdene ra qefelîyo. Risqê înan û domananê înan de gonîye esta, gonîya ma. Serê cefayê ma de, sefayê xo ramenê.

Kemal û Qemer û, zuqumî ‘pilta-pilte’ mekerê, no welat û no şar, çi dî, çi nêdî ? Şima çiqas adir bê zî, awe şima xurba kena. Waxo ke Rayberî seba peran sareyê Alîşêran cira kerdêne,  zen kerdêne ke, Dolê Selanîgî û Dinya, ci ra hes kerdêne.

‘Nêro’ kotîyo, mezela Rayberî ? Xemê Kamî yo ?

Şima nêzanenê ke ma neway serra ke mezela Seyîdê ma pers kenîme, gêrenîme ? ê kes ê ke Yado’ yê Çewliğî şehid kerdê kam se keno înan ? Kam nameyê înan zaneno? Xemê dewleta Tirkî nîyo. La, ma, reng û vengê Yado’yî wesênenîme.

Adir û awe, têmîan de nêbenê, rastîye û înkar, pîya nêbenê.

Bandurê înkarî û welatê ma, pîya nêbeno. Ma xora ebe no hal rehet nîme, la bandura Tirkî zî heta ke welatê ma de mevecîyo, ne rehetîye vênena, ne zî ‘canê xo de’ xêyr nêvêneno.

Şima ebe na neheqîye, ebe na zalimîye her tim ‘sefa’ bancê, ma zî ‘cefa’ ha !

Demê bêçaretîye vêrd ra, endî yaxme çîn o.

Şima û ‘aqilê xo’, endî ‘açlim kenê, saçilim kenê’ se kenê, bikerê.

 

İlhami Sertkaya

11-8-2011